政情：單雞買台股基金斬獲豐

白鴿黨副主席「單雞」單仲偕不嬲都有炒吓股，所以有個朵叫「白鴿股神」，佢年幾前睇準台灣政局穩定，台股有望穩步上揚，於是透過基金買台灣股票，一心諗住長揸唔放。

佢尋日拖埋班黨友同無家者世界盃香港代表隊踢友誼波，講起最近市況，佢話早兩日已經放晒啲台股，大約有一成幾至兩成回報，既然成績唔錯，所以咪放手囉。因為台灣嘅島形似足番薯，所以亦叫做番薯島，而單雞仲以「夠皮」嚟形容今次回報，應該大有斬獲，睇嚟佢賺咗個金番薯返嚟喎！

近期股市升到砰砰聲，單雞反而趁呢個時候沽貨，莫非佢有獨到見解？佢謙稱唔敢教人點做、亦唔肯定個市係咪見咗頂，但佢自己已經着手減磅，賺咗錢嘅股票都放番出去。識得喺牛市見好就收，唔怪得之單雞成日有賺啦！

股場報捷，但波場就慘淡收場。平時都有踢波嘅白鴿黨立法會議員冇個現身，主要靠一班黨友撐場，面對訓練有素嘅無家者世界盃代表隊，梗係輸到趴地啦，結果八比三完場，叫做唔使捧蛋。