政情：馬忠禮千五蚊贏十五萬
政情：馬忠禮千五蚊贏十五萬
早前以二億五千萬元成功競投乾隆古董葫蘆花瓶嘅政壇富婆張永珍，出手闊綽令全城嘩然。早前見到佢個仔、大慶石油公司總經理馬忠禮，原來佢情迷靚車同名錶，癡迷程度同媽媽對古董嘅熱情不相上下。
身兼中總會董嘅馬忠禮早前入馬場撐中總盃賽，佢話名下靚車有十二架，包括林寶堅尼、瑪莎拉蒂等，名錶佢最鍾意卡地亞，大大話話有十二隻，最貴嗰隻要成二百幾萬元。當日佢以千五蚊賭注，贏咗十五萬，眼光同手氣都唔錯。
講番媽媽價值連城嘅古董收藏，佢話啲古董擺喺香港嘅銀行保險箱，方便媽咪得閒去睇吓。上次張永珍送咗個用四千幾萬元投番嚟嘅古董花樽畀上海博物館，阿仔爆料話，嗰次係博物館館長落嚟香港攞上去，只不過買多一張回程飛機票咋。
馬忠禮爆料話，上海博物館館長當年自攜四千萬古董返上海。右及中為中總會長蔡冠琛夫婦。