政情：胡競英蒲頭避談亞視
政情：胡競英蒲頭避談亞視
「亞視義工」王征嘅遠房親戚、港商黃炳均，獲廣電局批准購入百分之五十二亞視股權後，亞視股東之間嘅爭拗似乎暫時平靜咗落嚟，但被停職嘅亞視行政總裁胡競英一直去向成謎。尤其王征早前表態有意應徵亞視行政總裁之後，胡競英嘅處境就更加尷尬。
仲記得王征話會考慮應聘行政總裁時，代表亞視另一股東蔡衍明嘅亞視董事黃寶慧即刻還以顏色，話胡競英係被停職，未被解僱，行政總裁一職並冇空缺。
一直潛水嘅胡競英終於浮出水面，早前喺一個酒會見到佢，睇落佢好好精神，一貫爽朗健談，但提到佢嘅工作就謹慎起上嚟。問佢依家職務有冇變，仲使唔使返大埔嘅亞視總部等，佢都笑而不答，話呢啲問題要問王征喎！即係將問題推晒畀王征啦！佢又讚王征好有理想，亞視可以做得好好，仲叫大家要繼續睇亞視節目添！
