政情：高達遊墨西哥冇啖好食瘦三磅

政府早前事先張揚話施政報告會針對房屋政策，各黨派嘅房屋事務負責人肯定好唔得閒，而立法會議員「高達」李永達就趁瘋狂開工之前，上個月尾撇甩老婆、屯門區議員陳樹英，同大學同學去咗墨西哥進行長達兩個禮拜嘅文化古蹟之旅叉電。

講明係睇文化古蹟，目標就係墨西哥城東面嘅特奧蒂瓦坎遺迹，入面有兩座著名金字塔：太陽金字塔同月亮金字塔。高達話墨西哥嘅金字塔同埃及嘅唔同，首先墨西哥所有金字塔都係平頂，外觀同其他差好遠，二嚟佢哋並唔係帝皇陵墓，只係用嚟祭祀同占卜，所以冇咁多機關，亦蘊含更大嘅文化意義。成個遺迹面積超過八十平方公里，唔怪得高達行足四日先行得晒啦！

佢又去咗一個東南部小城、墨西哥嘅度假聖地坎昆（Cancun）抖吓，坎昆面臨加勒比海，風景秀麗，但佢就未能夠好好享受。點解？因為當地食物唔啱食囉！佢話墨西哥最出名就係薄餅，但佢慣咗食清淡嘢，薄餅太油好易滯，餐餐又冇乜菜食，結果兩個禮拜瘦咗三磅。