政情：雷禮權夫婦馬場耀帽揚威

沙田馬場尋日舉行婦女銀袋日，城中名媛淑女大玩帽子戲法，但九巴後人William雷禮權不讓女士專美，自製巨型雞冠帽，太太利蘊珍就戴頂大帽遮晒成塊面，帽邊吊住一棚假牙，兩公婆搶晒鏡。

為炮製獨一無二嘅禮帽，William出門前花十分鐘，以銻金屬左屈右屈整成一頂帽，佢覺得外形似足一部「金鐵馬」。但金色未有為佢帶嚟財氣，尋日場場落注，結果場場輸，夾埋唔見幾千蚊。好彩頂帽幫佢贏番唔少分，攞咗個最佳頭飾獎，算係攞番個安慰獎。

同場有唔少勁敵，行政會議成員梁智鴻嘅太太就以一頂購自英國嘅華麗禮帽示人。現場靚女滿場飛，問佢怕唔怕老公女，佢信心十足咁話：「佢（老公）專注社會事務，連我都睇唔到，又邊有時間女呢？」

雞冠頭打扮嘅雷禮權同一身「皮氣」嘅太太利蘊珍成為尋日馬場焦點。