政情：莊偉茵出面安撫金勞詹

日前內地歌手汪峰大鬧香港機場，向地勤人員爆粗，原來香港立法會都有個疑似「翻版汪峰」。

早排立法會金融服務界議員「金勞詹」詹培忠喺拉斯維加斯參加百家樂大賽，之後經溫哥華返香港，點知遇到小插曲，最終仲驚動埋航空公司高層添。我哋早排收到個電郵，報料人聲稱目擊金勞詹喺溫哥華機場用好冇禮貌嘅態度鬧啲國泰航空嘅地勤，最終仲搞到要報警先收到科。

尋日打畀金勞詹求證，佢對呢件事唔肯多講，叫我哋直接打畀「偉茵」問喎！究竟邊個係「偉茵」呀？原來係國泰航空企業事務董事莊偉茵。

莊偉茵話金勞詹當日想提早離開溫哥華，但由於機位滿晒，地勤職員被迫拒絕。金勞詹唔係幾開心，最終都喺原定時間返港。莊偉茵承認金勞詹事後的確打過電話畀佢，佢亦好努力咁同金勞詹解釋，件事最終都解決咗。佢話：「詹生係我哋馬可孛羅會嘅尊貴會員，我同詹生都好好朋友，解釋後都冇事。詹生講嘢係大聲啲，平時開心同唔開心都會大聲㗎啦。」