政情：富貴黨搞民調簽「喪權」條款

經營時裝連鎖店嘅富貴黨常委田北辰，半世人都係做老闆，無論喺公司業務或早前擔任九鐵主席期間，都顯示出強勢領導嘅形象。但直選令人謙卑，田二少自○八年入富貴黨做直選戰士，一路蛻變，尤其喺九龍西一役後，更知選民力量嘅重要性，於是由大老闆一百八十度轉型至好尊重民意。

有黨內人指田二少依家就好似鐘擺咁，由一個極端擺向另一極端，乜都話要聽民意，乜都以民調先行，決策機械化。好似富貴黨今日公布委託港大民意研究計劃進行嘅最低工資調查，據聞一度引起黨內好不安。

黨內人話，以調查結果決定富貴黨對政府首個最低工資水平建議嘅立場，有潛在政治風險，依家外界盛傳水平訂於較高水位嘅二十八蚊，一旦調查顯示有另一個數字，富貴黨係咪死跟呢？「廿蚊張」事件已令富貴黨失分唔少，當大家將事件逐漸淡忘，富貴黨跟同唔跟個民調嘅結果，都令個黨變得好被動。

其實富貴黨大可以唔公布調查結果，當冇做過算數，但原來該黨同港大民調鍾庭耀簽合約時，為咗攞個平啲價錢，雙方訂明不論民調結果如何，都一定要對外公布，以保障民調機構嘅人氣程度，即係話民調結果冇得掃入地氈底。估唔到富貴黨做民調亦要睇餸食飯，貪平而簽下「喪權」條款，今日大家睇吓佢哋點拆招啦。