政情：德成局長不知民間苦

施政報告提出成立青年服務團計劃，資助十八至二十九歲嘅高中畢業生或大專生，利用投身職場前嘅一段時間，去內地做義工半年至一年，鍛煉意志之餘，順便了解國情，計劃交咗畀民政事務局負責。

唔講會提供乜嘢配套

局長曾德成尋日就發功，喺局長隨筆撰文硬銷呢一個計劃，話「gap year」（空隙年）喺歐美盛行咗好多年，都係講年輕人投身社會前出去遊學一段時間，增廣見聞，就連英國威廉王子十八歲時都去咗智利山區一年，幫手建步道同教當地小朋友英文。政府肯多花心思開拓青年人視野固然係好事，但如果好似德成局長咁一頭「舂」落去就死硬喇！

究竟德成局長知唔知，依家好多大專、大學生都要借政府錢讀書，畢業後孭住政府一身債，起碼還十年先還得清，所以畢業生唔係頭痕搵工，就係頭痛唔知點還錢，叫佢哋延遲一年出嚟做嘢還錢，真係有啲不切實際。再講，叫啲大專生同大學生去做一年義工，又唔提會提供乜嘢配套，分分鐘硬銷銷出禍喎！

此外，依家中、小學生愈嚟愈多課外活動，唔少基層家庭牙痛咁聲，根本負擔唔起仔女有咁多額外開銷；但如果唔畀佢哋去，又怕永遠擺脫唔到跨代貧窮，陷入兩難局面。

同巿民之間都有個gap

多個政黨多次提出要求，希望政府可以為清貧家庭提供課外活動津貼，又或者提供免息貸款畀學生讀書，幫助大家解決跨代貧窮，結果當局都係借咗聾耳陳隻耳。依家仲話要用一年時間停工停學去內地服務，就算政府提供埋生活同交通津貼，其實對基層市民嚟講，都係有得睇冇得食，仲變相加深咗本港社會深層次矛盾添！

按道理，民政局係接觸民意最前線，應該係最清楚民情嘅政策局，但今次事件反映，德成局長竟然不知民間疾苦，盲摸摸亂咁推銷，佢幾時先會擘開對眼，睇清楚佢同市民之間個gap有幾大呢？小心差錯腳跌死呀！