政情：高永文再嘗復活家鄉菜
政情：高永文再嘗復活家鄉菜
籍貫係潮安嘅骨科名醫高永文，除咗積極推動潮州商會青年事務委員會嘅工作之外，近年仲醉心鑽研潮州文化，不但義務教授潮州話，仲將幾近失傳嘅傳統潮州家鄉菜「復活」。佢最近就邀得九龍城汕頭澄海老四酒家大廚郭師傅，幫佢炮製一味高媽媽嘅首本家鄉菜「魷魚肉餅蒸豆腐」。
當日入到廚房已見郭師傅準備好晒食材，其中最重要係以鹽生醃咗一個月嘅連內臟原隻鹹土魷，為菜式嘅靈魂所在。郭師傅喺樽內取出兩隻烏卒卒嘅鹹土魷，去內臟清潔乾淨後，加入同等分量嘅豬肉刴成肉餅，再打成膠狀，然後鋪喺磚形豆腐上，放入蒸櫃蒸八至十分鐘即成。
高醫生話原本醃過嘅鹹土魷相當鹹，但夾埋冇味嘅豆腐，鹹味恰到好處之餘，仲帶出土魷嘅鹹海鮮味。佢仲推介咗幾味潮州海鮮，例如炒泊殼、螄蚶同川椒鮮魷。
用泊殼汁撈飯，高永文話好食過星斑撈飯。
呢味就係高媽媽嘅首本家鄉菜魷魚肉餅蒸豆腐。
以辣椒、蒜頭、芫荽同高粱酒調製嘅烚螄蚶好惹味。
