政情：吳仕福告御狀插邱騰華

煲呔曾前日聽取十八區區議會正、副主席對施政報告嘅意見，據聞輪到西貢區議會主席吳仕福發言時，就扯上近期熱爆嘅擴建將軍澳堆填區問題，佢聲言西貢地區人士其實好想同政府合作處理將軍澳堆填區問題，可惜政府同地區溝通不足，矛頭直指環境局局長邱騰華冇做好諮詢工作。佢又話堆填區問題應該好似興建骨灰龕咁，十八區都有責任幫手解決。

福哥擺明告邱騰華御狀，但煲呔曾回應時唔敢再講堆填區，反指本港長遠需要興建更多焚化爐，減少垃圾體積，更呼籲各區主席喺呢方面幫幫手。不過，施政報告畀人用堆填區問題騎劫咗咁耐，煲呔曾後來先醒起叫大家言歸正傳講施政報告，部分人即時掩住半邊嘴笑，煲呔曾當堂瘀爆，真係多得邱騰華唔少。

面對各方批評，邱騰華尋日出席一個肺功能測試活動時表現得好唔忿氣咁話：「都市生活其實少不免有好多唔暢順嘅嘢，唔單止條氣唔順，呼吸有時都未必咁暢順！」其後佢利用肺功能測試儀器測試自己肺量，雖然醫生話佢肺功能正常，但佢死都要話自己「都係谷谷哋氣」。邱騰華劣迹斑斑，已成為政府嘅負資產，如果繼續死不悔改，捱唔捱得完餘下兩年任期都好難講囉！