政情：搞搞政：梁柏賢耍走上位傳言

蘇利民前日正式卸任醫管局行政總裁，尋日起程返澳洲照顧家人。醫管局主席胡定旭、一班一齊拆過彈嘅醫管局高層同醫生好友，前晚羅漢請觀音，為「歸故里」嘅蘇利民餞行。盛傳為下屆CEO熱門人選嘅梁栢賢最早到場，七點四十分就現身。

梁醫生話同蘇利民一齊經歷過豬流感同三聚氰胺奶粉事件，彼此合作無間，唔知蘇利民臨走前有冇交低手頭上啲嘢畀梁醫生呢？笑笑口嘅梁醫生即時耍手話︰「未知邊個做（接任），唔好講呢啲嘢！」跟住仲話未有公布，公布出咗先知邊個做。睇嚟佢唔止警覺性高，仲係太極高手，呢招太極推手乜都推晒啦！

肥胡前晚帶咗支白酒「舍得」去贈興。衞生防護中心總監曾浩輝都帶住袋神秘禮物嚟，佢唔肯講係乜嘢，但就大讚蘇利民好好人，講咗好多澳洲趣聞趣事畀佢聽，兼且介紹好多澳洲靚酒畀佢。至於主角蘇利民同太太就壓軸登場，初來港時患咗香港傳媒恐懼症嘅佢，依家已經冇病冇痛，仲話好唔捨得香港，所以一定會返嚟咁話。睇嚟「無官一身輕」呢句話，唔係淨係中國人先啱用。