政情：譚志源靠聖經撐政改
政情：譚志源靠聖經撐政改
特首辦主任譚志源尋日喺facebook post咗一段訪問佢嘅影片，題為「也無風雨也無晴—從山窮水盡到通過政改」。佢喺訪問中自爆，話臨近政改表決前，佢同同事本來都感到山窮水盡，點知六月十三號佢去完崇拜之後，突然諗起一段聖經經文，大意係上帝要做一件新事物，譬如喺沙漠開一條河，令佢覺得人解決唔到嘅，唔代表神解決唔到。
於是佢將段經文放上facebook同大家分享，點知嗰日之後，白鴿黨嘅立場真係有變，黨主席「鐵頭仁」何俊仁表明，政府接受區議會改良方案就會放行，所以佢哋就拿拿聲約見鐵頭仁。
到咗六月二十六號端午節，佢又同班基督徒祈禱，呢次佢直頭受到好大嘅感動，覺得神一定會搞掂政改，結果政改真係歷史性獲立法會三分二議員支持通過。唔通政改通過係神蹟？
譚志源以蘇軾嘅詞《定風波》為短片作結。