政情：張大千贈畫酒店職員

國畫大師張大千嘅作品《金箔荷花》尋日首次喺香港展出，張大千嘅千金張心慶更加專程由內地來港，出席由尋日起一連三日喺中央圖書館舉行嘅紀念張大千一百一十一歲華誕藝術精品展開幕禮。年逾八十張心慶嘅聲如洪鐘，每提及爸爸，總流露出欣賞同自豪嘅神情。

張心慶憶述，早喺一九六三年，佢曾經同爸爸嚟過香港，下榻彌敦道某間酒店，當年有兩位年輕嘅酒店職員見到張大千大駕光臨，即時請佢親手畫幅畫作畀佢哋。張大千一口答應，即席揮毫，咁啱有位老紳士經過，見到幅畫咁靚，即刻開聲要買咗佢，仲講明會畀合理價錢。點知張大千聽到後冇心動，仲同老紳士講，幅畫已經有人要咗，就係身邊兩位酒店職員。老紳士聽到唔係幾高興，自謔話：「原來我還比唔上這兩位年輕人。」

張大千聽完後不慍不火咁話，無論對乜嘢人，即使係平民百姓，佢都係一視同仁。最終老紳士悻悻然離開，而嗰兩位有幸得到大師贈寶嘅年輕人即時淚流滿面，讚大師唔單止畫靚，連心靈都一樣靚。