政情：入境處二哥都拜關二哥

差人拜「關二哥」就聽得多，原來專責拉黑工嘅入境處阿Sir都有拜關二哥。真係有咁啱得咁蹺，入境處「二哥」副處長陳國基尋日就聯同其他紀律部隊阿頭，一齊出席深水埗關帝廟門樓落成典禮，齊齊拜關二哥，席上仲出現一位神秘嘉賓，佢就係四叔大仔李家傑嘅師傅—中國道教會協會會長任法融嘞。

唔好以為入境處阿Sir淨係喺機場同邊境幫旅客揼印，佢哋仲要肩負打擊黑工同假證件等非常任務，工作性質同查案嘅警察差唔多，有入境處阿Sir話佢哋部分同事都會拜吓關二哥。

（左起）入境處副處長陳國基、消防總長黎文軒、警務處刑事及保安處處長鄧甘滿同懲教署署長單日堅，尋日出席深水埗關帝廟門樓落成典禮。右一為李家傑嘅師傅任法融道長。