政情：Pauline埋地雷畀自己踩

立法會民望偏低，議員要負上好大責任，除咗少啲遲到早退唔開會外，發言質素都要提升一下。差唔多算係議員「保母」嘅立法會秘書長吳文華（Pauline），今年開始為每次禮拜三立法會大會嘅議案辯論準備一份參考資料，等有心發言嘅議員可以惡補一下。保母果然服務周到，咁樣做會唔會養懶人仲係未知數，但肯定加重秘書處工作量。

議員發言水準參差

一直以嚟，秘書處會為各個事務委員會即將討論嘅政策，預備好一份背景資料，呢份「貓紙」係畀班唔熟書嘅議員咪吓，了解有關政策嘅來龍去脈。至於逢禮拜三立法會大會嘅議案辯論，過往都係由有意發言嘅議員自己做定功課，再唔係就臨場打天才波，難怪議員嘅發言水準好參差。

可能有見及此，秘書處喺前日為今個禮拜三大會上辯論嘅議案，即殘疾人士交通需要同埋改善個人資料私隱保障，整咗兩份貓紙，當中詳述兩個議題嘅前因後果、相關文件出處等，相信睇完之後，人人都可以學議員咁喺議事廳內發言，應該會講得有紋有路。

之不過，呢啲事前準備工夫本來就係議員嘅責任，秘書處咁做固然係細心之舉，但亦隨時會捉蟲。

三個月後全面檢討

點解？眾所周知，每年立法會都會辯論六四事件，雖然啱啱立法會主席裁決唔可以喺下禮拜三休會辯論釋放獲頒諾貝爾和平獎嘅在囚內地異見人士劉曉波，但日後或可翻生，呢啲具爭議嘅動議辯論，秘書處應該點取材呢？若果秘書長整理嘅背景資料稍有差池，隨時畀人捉住嚟大做文章鬧番轉頭，可以話係埋地雷喺自己身邊，分分鐘踩中被炸到粉身碎骨。

秘書處就話呢項新服務係試驗計劃，實行三個月後會全面檢討，然後再作改善。最終係好係壞，大家不妨放長雙眼睇啦。而三個月後檢討，都未到出年辯論六四事件，但期間亦有可能會觸及劉曉波嘅辯論喎，到時就睇吓保母點拆彈嘞！