烽火台：窮人已經絕育了

窮書生：別再做窮人，做隻貓做隻狗不做窮人……

窮光蛋：酸秀才，首歌咁唱嘅咩，咪識幾隻字就喺度亂作喎。

窮書生：你識咩呀，古語有云，文章合為時而著，歌詩合為事而作，依家我反映現實生活。須知當今世上，大把窮人飯都無得食，但台灣有狗零食、狗蛋糕不特止，最近仲出咗一種狗隻專享公仔麵；再睇香港，幾多人無錢成家立室，但有商場喺十月十日舉行狗婚禮，幫啲狗夫妻着上禮服、婚紗。你話係咪做窮人不如做狗啊？

窮光蛋：人分貧富，狗亦有貴賤之分，你用富貴狗同窮人比較，簡直狗屁不通。

窮書生：未必。你睇最新施政報告，一邊增建寵物公園，一邊鼓勵市民領養流浪貓狗，幫啲領養寵物提供免費絕育。政府連流浪貓狗嘅繁殖大計都照顧埋，但係唔少貧窮老人就孤苦伶仃無人理，仲唔係對狗好過對人？

窮光蛋：咁又未必，港府今時今日先為寵物提供絕育服務，但窮人嘅絕育服務早就已經推出啦。

窮書生：此話怎說？

窮光蛋：事關港府扶貧不力，窮人愈來愈多，基層勞工愈搵愈少，有仔生都無錢養。再講樓價節節高升，港府穩定樓價又束手無策，一般夫婦連豆腐膶單位都買唔起，搞到個個唔敢生仔，咁同絕育有咩分別？

窮書生：係喎，因為政府無能，窮人已被絕育了。

窮光蛋：可見港府對貓狗窮人一視同仁，咪幾公平囉……