熱帶語林：忙於愁褲 無暇仇富
熱帶語林：忙於愁褲 無暇仇富
調查員：「先生先生，阻你一陣，可以同你做一份問卷調查嗎？請問你是否仇富？」
受訪者：「本來冇時間，我好鬼死忙㗎，手停口停嗰隻，不過見你問得咁有趣，姑且陪你癲一癲。你係話仇富抑或愁褲？」
調查員：「吓？」
受訪者：「仇富係仇視大富翁，愁褲係愁恨褲穿窿，你講嘅係邊一科先？」
調查員：「上頭交帶……好似係仇視大富翁……」
受訪者：「傻啦，邊得閒同你仇富吖，我真係好鬼死忙㗎，忙到完全冇時間仇視任何人。我哋呢班窮到燶嘅低下階層，日捱夜捱都係得雞碎咁多，死做爛做一身兼三職仍然搵朝唔得晚，顧得個頭又顧唔到隻髻，何來閒情逸致仇視唔知邊個冚家富貴吖！」
調查員：「先生先生，咁你對於特首嘅施政報告話要設立一百億元關愛基金扶貧又有乜睇法？你會唔會覺得係政府幫自己形象洗底？」
受訪者：「睇法？冇睇法喎，我真係冇時間理佢用乜嘢辦法洗底褲，有時間都去執紙皮啦。」
調查員：「係洗底，唔係洗底褲……」
受訪者：「一樣啫，底褲唔洗好易臭。好似我咁吖，又愁底褲穿窿，又愁冇時間洗，幾臭㗎！」
調查員：「咁你會唔會申請關愛基金呢？」
受訪者：「唉，都係唔同你講嘞，費事嘥我時間。你同特首單聲吖，唔使關愛咯，畀我有尊嚴生活嘅最低工資好過啦！」