政情：搞搞政：西九董事局鬼祟換人

推倒重來嘅西九文化區，唔經唔覺搞咗差不多兩年，第一屆董事局成員嘅任期亦即將屆滿。政府尋日公布下一屆董事局成員名單，十五位非公職人員嘅董事中，來自日本嘅長谷川祐子任滿閃人，由建築師馮永基接棒。

馮永基任職過建築署成十年，自從喺○八年退休之後，就加入西九董事局嘅發展委員會做委員，所以對西九項目應該相當熟悉，而且佢除咗係建築師外，本身亦係水墨畫家，幫手搞西九呢個文化項目可謂相當合適。

至於離任董事局嘅長谷川祐子，唔單止係東京都現代美術館總館長，同時係日本金澤二十一世紀美術館嘅創館藝術總監，成功將金澤二十一發展成旅遊景點。當初睇中佢都係因為佢喺策劃展覽同籌建新博物館方面有過人之處，如今佢喺西九尚未落成就離任，當中唔知有乜玄機。

睇番政府嘅公布，唔單止冇解釋長谷川祐子要走嘅原因，更加冇交代點解會搵馮永基。我哋問過特區政府先知道，原來長谷川祐子係以私人理由離任，再具體啲嘅情況都欠奉，成件事非常耐人尋味。

依家三份西九概念圖則顧問正進行諮詢，未來幾年都係西九發展嘅關鍵時刻，睇嚟人事變動都係愈少愈好。