政情：蘇利民自爆患傳媒恐懼症
政情：蘇利民自爆患傳媒恐懼症
尋日係醫院管理局行政總裁蘇利民嘅最後一個工作日，今日就會離港返澳洲老家。佢尋日同傳媒搞咗個歡送Party，仲自爆原來有傳媒恐懼症，話說佢○六年嚟香港前，有人提醒佢要小心香港傳媒，搞到佢好擔心，當佢同太太抵港落機後，知道好多傳媒喺機場守候，即時換番套西裝，當有記者問佢點解換呔（Tie）？佢就緊張到以為問佢搭長途機係咪好攰（Tired），佢諗起都覺得好笑。
另一單笑料係佢初抵埗時曾對阿女講，喺屋企唔好亂開門畀陌生人，擔心私隱畀傳媒踢爆，遇啱一次有記者打電話去佢屋企，阿女竟然嚇到講大話，聲稱冇呢個人，搞到蘇利民捧腹大笑。佢仲話好唔捨得香港，傳媒對佢好好，唔係傳聞中咁可怕，仲話第日遊港，會買手信畀傳媒朋友。
蘇利民收到傳媒送上嘅背囊後，表示會好掛住香港。