政情：煲呔曾噏錯唐唐係特首

煲呔曾尋日上英文電台，被問到扶貧招數「關愛基金」搵政務司司長（CS）唐英年做主席，有為唐唐日後競逐特首造勢之嫌，佢反駁講法荒謬，話主席人選要有誠信、有聲譽同可獲各界認同，政務司司長係最佳人選，點知鬼拍後尾枕，佢將Chief Secretary（CS）講為Chief Executive（特首），唔知係咪佢潛意識認定唐唐想爭特首寶座。煲呔曾發覺自己噏錯嘢，急急糾正，但已覆水難收。

「關愛基金」涉及百億元巨款，唐唐既冇開記者會，冇上電視推銷，連簡布會都冇，「關愛基金」喺唐唐心中變咗「關人基金」，好似完全唔關佢事咁。點解乜都唔做？憲報尋日公布，佢由尋日（十五日）起，一連休假五日至十九日，期間其CS職務由政制及內地事務局局長林瑞麟署理。

基金點樣運作、有乜扶貧項目同人事架構等等，一切懸而未解，唐唐竟然走去休假攤抖，只係尋日喺報章撰文，簡單解釋基金六點運作原則，話當務之急係加緊籌組基金委員會。口講就急，實情唐唐嘅表現一如佢嘅金句，就係「條條fing」！