政情：龔仁心酒店開幕勁風騷

華懋集團日前爆冷投得九龍塘義德道地王後，身為執行董事同管治委員會主席嘅龔仁心都表現得好風騷，尋日同太太、妹妹龔中心同龔因心、華懋高層一齊出席集團旗下港島南區南灣海景酒店（L'hotel Island South）開幕禮，由傍晚六點開幕禮玩到晚上九點慶祝派對，表現得情緒高漲，期間同穿低胸裝嘅性感女郎跳舞，成為全場焦點。

難得龔仁心現身，記者梗追問佢對賣地、樓市走勢及規管「發水樓」嘅意見，但亦有人問佢係咪支持施政報告提出嘅關愛基金。佢話：「華懋都有慈善基金，都會計劃做啲嘢嘅，可惜有官司在身，基金唔用得住，所以唔係自己想點做就點做！」咁究竟會唔會捐錢畀關愛基金呢？佢反問：「係咪一定要捐畀關愛基金呢？我哋都唔知，華懋慈善基金有監管人，不過冇問題啦，遲啲做之嘛！」

至於華懋集團主席龔如心遺產官司案有乜新進展，龔仁心只拋出一個「等」字，佢話大家都知明年一月十日再開庭，一切要等到時先有分曉喎！