政情：廢令手尾長邱騰華難甩身

立法會早幾日以高票通過廢除擴建將軍澳堆填區嘅法令，雖然仲未知政府會唔會就立法會主席裁決提出司法覆核，但今次幾乎畀政府玩起，立法會又點會咁輕易放過政府。

環境局局長邱騰華係今次廢令風波嘅始作俑者，為免重蹈覆轍，立法會內務委員會主席Miriam劉健儀當然有同政府高層反映喇！

Miriam提要求唐唐一味推搪

Miriam尋日係內會匯報同政務司司長唐唐每周例會講咗啲乜？佢話當面要求唐唐列張清單出嚟，講明邊啲條例係立法會冇權審議，但唐唐即時拒絕，話整份清單出嚟好艱巨，有啲嘢冇咁徹底，同埋份清單出咗嚟之後會惹起好多爭拗咁話，只係承諾會考慮日後喺提交草案前會講明立法會係咪有權審議。

一聽就知，唐唐講嘅根本係推搪嘅說話，首先政府有責任向立法會提交充足嘅資料，仲有乜嘢叫做冇咁徹底呀？仲講到明清單會惹起爭拗，咁係咪應該早啲拎出嚟向公眾解釋清楚，仲喺度左遮右掩，唔通政府仲想搞出另一個堆填區翻版？

話之政府想點，內會即時要求立法會秘書處做研究，將過往或未來提交嘅草案，同堆填區廢令相類似嘅都搵晒出嚟。

立會整合資料設小組再跟進

據估計，立法會法律顧問都要花兩至三個月時間先整合晒啲資料，再喺內會成立一個小組委員會跟進。咁即係話，會追瘦邱騰華同政府，咪旨意咁易就甩身呀！

各黨派議員喺日前立法會嘅辯論中已經花咗幾粒鐘鬧爆邱騰華，仲炮轟佢係「三失局長」，喺事件中失職、失誤、失敗，要求佢同副局長潘潔一齊問責下台，但仍然氣憤難平，尋日喺內會又鬧多鑊甘嘅。

白鴿黨主席「鐵頭仁」何俊仁批評政府，話立法會冇可能冇權審議政府提交嘅草案，而黨副主席劉慧卿就炮轟政府，話若果有啲草案同法令係立法會冇權審議嘅，政府應該一早講，唔係拖到最後，咁樣嘅政府真係好混帳。

工聯會勞工界議員潘佩璆亦好氣憤咁鬧政府，若果立法會唔可以審議草案，咁不如唔好要立法會啦，若果政府唔講清楚點解立法會冇權審議嘅話，咁整個立法會都運作唔到。