熱帶語林：二○一九死線前夕

時光飛逝，歲月催人，眨下眼就到了二○一九年，一對夫婦倚坐窗前閒話家常。

老婆：「老公呀老公，住咗五年咯，我哋呢個『先租後買』安樂窩不經不覺已經到咗死線前夕，夠鐘要決定 o架喇。一係買，一係搬，買定唔買？」

老公：「唉……唉！上錯賊船！信錯瘟神！二○一○年計劃推出之時就話呎價四千啫，家陣？呎價過萬，你叫我哋呢種夾心階層點買得起！政府話就話租金回水一半，大概三十萬左右，但係對於六百萬樓價完全唔夠畀首期。買又買唔起，唔買就連一個仙回水都冇，呢鋪真係捉蟲！」

老婆：「咁你又唔可以賴晒個瘟神，當初佢都係諗住幫一幫我哋八十後置業，人哋又唔係背脊敲得響嘅生神仙，冇可能估得到九年之後係乜嘢世界。」

老公：「係我哋小市民估唔到就真，佢會估唔到？高地價長期不變，供應量永遠偏低，供不應求之下樓價冇可能唔升到嘭嘭聲啦！」

老婆：「咁點算呀？不如我出去做雞搵錢吖。」

老公：「做雞冇用嘅，搵來搵去都搵唔夠首期啦，何況你已經唔係九年前嘅如花似玉，家陣已經年老色衰，我怕你接唔到客咋。不如咁啦，一係你斬死我，一係我扑死你，只要呢個單位變成凶宅，樓價肯定會大跌，到時候咯喎，死剩嗰個咪買得起囉！」

老婆：「乜你仲係九年前咁激o架……不過又好似係唯一方法。好啦，一於咁話，抽生死籤！你抽先定係我抽先？」