SUN世代：有錢仔做老竇方知爸爸好

被譽為「香港最後貴族」的周啟邦今年初病逝，兒子周國豐細訴父子情，坦言有錢仔的身份，令他很難獲得別人認同，他又透露自己與父親的性格像「水溝油」。如今父親已不在，他又剛為人父，才體會做父親的心情，明白父親的好：「依家做乜都會諗，如果Daddy喺度，佢會點做。」

二十五歲的周國豐（Brandon），去年一次過圓了父親想他做律師、結婚和生仔的心願，讓父親含笑而終。已是大律師的他，剛陪伴母親到瑞士散心，返港後即投入工作，跟師傅清洪四出打官司，連派卡片也守足規矩：「大律師唔可以賣廣告，卡片都係你問起，我先畀得你㗎。」

與父親性格「水溝油」

回想昔日父子情，Brandon形容和父親性格像「水溝油」：「我哋嘅性格好唔同，佢將生命當舞台，要令身邊人開心，我冇佢咁偉大，只專注做自己嘢，性格又內向，我諗佢啲朋友都有啲失望！」

父母是Ball場花蝴蝶，出入坐勞斯萊斯，一度令他很抗拒：「小學時，父母叫司機揸勞斯萊斯送我返學，我唔敢喺正門落車，叫司機喺山腳放低我，就算依家叫我坐，我都覺得好尷尬！」他連穿衣也只選深色，父親最愛的金色絕不穿上身。他說：「佢覺得自己又型又潮，唔明點解生咗個咁嚴肅嘅仔！」

睇番轉頭「欣賞Daddy」

有錢仔的身份，曾惹來同學反感，對他拳打腳踢，小學科科「紅」，直到十二歲到英國讀書，無人再在意他的背景，成績才突飛猛進。他有感而發：「我覺得呢個身份係 more of a curse than a blessing（禍多於福）！我要比別人付出多十倍努力，先可以得到認同。」

養兒方知為父難，做了父親，卻令他有新體會：「依家睇番轉頭，會識得欣賞Daddy嘅優點，佢對人真誠、冇架子，記得晒所有人嘅名，個個朋友都鍾意佢。」他正努力學習父親待人接物的態度：「依家做每件事都會諗，如果我係Daddy，佢會點做呢？連老婆都話我以前都冇咁聽話！」兒子禮淳八個月大，他打算將這一套教導兒子：「父母身教好重要，我會以身作則，希望個仔將來都係一個忠誠嘅人。」

周國豐小檔案

年齡：25歲

學歷：英國伯明翰大學法律系學士、

　　　英國倫敦大學法律系碩士

現職：大律師

興趣：武術、電影、旅行

場地提供：MANDARIN GRILL + BAR