政情：政委會選舉建制派走票

新一個立法年度開始，立法會各個委員會正副主席都重新執位，雖然大部分都喺呢屆立法會會期初段協商好晒，但比較敏感嘅政制事務委員會正、副主席就要年年選過。政制委員會有三十七個委員，其中二十五個係建制派議員，就算尋日有三個冇到，佢哋要霸番個主席位都十拿九穩。白鴿黨副主席劉慧卿年年挑戰，仲成功喺建制派手上搶到一票添！

其實以前都有建制中人提過，不如放個副主席位畀泛民做，大家一人一次平衡啲，惟正、副主席都會比其他人早一步知道政府政策，大部分建制派都唔肯放行。尋日建仔嘅譚耀宗以二十二票支持下成功連任，不過去到選副主席時，被提名嘅經濟動力「蘇菲」梁劉柔芬得番十八票，除咗有三個議員行開咗冇投票，仲有一票走咗去卿姐度！但蘇菲喺競選副主席時都冇去開會，畀人感覺好似臨時拉伕咁，有人唔撐佢都唔奇嘅！

本身應該傾力支持卿姐嘅黨友張文光就差啲甩轆，喺選主席後出咗去收傳真，差啲投唔到副主席，令卿姐少一票支持，好彩最後佢趕得切，如果唔係實畀卿姐扭耳仔！