政情：吳傑莊傳火炬雙重幸運
政情：吳傑莊傳火炬雙重幸運
廣州亞運會嘅火炬傳遞儀式前日展開，八十名火炬手中，有三個係香港人，佢哋就係「霍老」霍英東長子嫡孫霍啟剛、香港青年學生動力主席吳傑莊同歌星古巨基嘞，其中吳傑莊獲安排傳第十八棒，攞正佢嘅Lucky Number「18」。
佢哋獲揀選成為火炬手自必有因，啟剛係廣州亞運香港志願者代表團團長，而本身做開拓網上商務平台生意嘅吳傑莊，除咗係香港青年學生動力主席外，亦係中山市青聯副主席，所以火炬傳遞儀式喺中山舉行，吳傑莊算係半個東道主。
吳傑莊前晚講起有份參與火炬傳遞儀式時，仍難掩興奮心情，話感到好榮幸、好幸運，因為可以親身感受呢項亞洲盛事，而佢獲安排負責傳第十八棒，而「18」一向係吳傑莊嘅Lucky Number，就算手機號碼佢都揀有「18」嘅號碼，今次傳火炬又攞到呢個數字，都算係雙重幸運囉！
吳傑莊負責為廣州亞運傳第十八棒火炬。