政情：醫管局二十周年玩尋親

醫院管理局趁下月成立二十周年大玩尋親遊戲！局方定於下月十八號舉行晚宴，屬於成立以嚟最大規模嘅慶祝活動，屆時會邀請歷屆嘅主席同行政總裁出席，分享吓醫管局二十歲生日呢件喜事。

局方仲好有心思咁設計咗一張傳媒請柬，展示由九○年至今嘅歷屆高層，當然唔少得「親生老竇」、首任主席大Sir鍾士元，請柬仲記載咗醫管局發生嘅大事，包括東區醫院同北區醫院開幕、醫管局大樓入伙、前線醫護對抗沙士、應付內地孕婦來港生仔潮、為南亞海嘯籌款等令人難忘嘅事。

咁都不特止，醫管局又舉辦徵文比賽，邀請九○年十二月喺公立醫院出世、即剛滿二十歲嘅年輕人參加，名副其實玩尋親遊戲，畀呢班醫管局嘅「親生仔女」，分享對公院服務嘅感受同期望。局方為比賽設立六個獎項，冠軍可以獲得依家最潮嘅iPhone 4手機，欲知詳情可以瀏覽http://www.ha.org.hk/20year/birthdaymessage網址，六名得獎者仲可參與慶祝晚宴，同二千人慶生。