政情：搞搞政：施政報告治標如萬金油

前日發表嘅施政報告劣評如潮，有網民隨即揶揄施政報告封面採用橙色，話香港市民好「橙」，實情係好「慘」咁解。

人稱「文壇俠士」嘅全國政協委員劉夢熊繼前晚上完電台發炮後，尋日喺中環high tea時又鬧多次，批評施政報告「周身刀，冇張利」，十足萬金油，用咗只係好少少，但治標唔治本。原來佢上月初開策發會時已提醒煲呔曾要有「大海航行靠舵手」嘅政治領袖氣魄，勿坐困愁城，但結果都係一片空白。

滿腹牢騷嘅劉夢熊首先批評金融政策，冇正視不斷貶值嘅美元會拖累港元「陪葬」，同埋熱錢流入氾濫引發資產泡沫危機，佢話：「雙曾（煲呔曾同財爺鬍鬚曾）都係港英文官，有執行力，但冇決策力；有戰略能力，但冇戰略思想！」佢又批評發展六大優勢產業同以前數碼港、中藥港冇分別，最終淪為口號。

被外界嘲為「置灰心」嘅「置安心」計劃，佢形容只係「雞零狗碎」。佢話樓價不斷上升，有心置業嘅人士依然無能為力，所以一定要復建居屋。佢仲警告煲呔曾，社會深層次矛盾唔解決，只會繼續坐困愁城。