政情：田少扶貧基金被打荷包

富貴黨前主席田北俊，早喺七月已提出商界扶貧基金概念。據悉，田少同大孖沙幾經磋商，最新構想將基金化整為零，改由大孖沙各旗下慈善基金低調開展扶貧項目，但全以一個旗幟徽號推出，到漸見成果就逐項公布。佢哋連徽號都諗埋，以「心」字做主體設計，象徵商界有心為社會做番啲嘢。點知施政報告宣布關愛基金大計之後，田少一切心血頓成明日黃花，事關政府抄橋搞扶貧基金。咁大塊招牌壓落嚟，你估班大孖沙最後選擇捐畀政府定係田少呢？答案不言自明啦！

雖然畀政府打咗荷包，但田少尋日顯得不太在乎，話政府終於肯設基金扶貧，求之不得。佢仲話搞扶貧基金，傷神、費時同耗費人力物力，若成效不佳，更加吃力不討好，依家政府主動接火棒，除咗商界出錢，庫房亦出五十億元，理應事半功倍，佢舉腳贊成。

佢話鋒一轉，不忘提醒政府，今次搞扶貧基金千祈咪雷聲大、雨點小，佢嘅扶貧基金本打算年底落實，希望政府亦唔好拖拉，咁樣對貧苦大眾好唔公道。佢又呼籲關愛基金加番「商界」兩個字喺前面，事關當初大孖沙搵佢搞扶貧基金，其中一個目的就係想做善事之餘，亦可改善形象，紓解社會上仇商情緒，但依家大孖沙畀政府揼完心口，卻冇彩可攞，唔係好公道。