政情：邱騰華解畫嘥紙兼廢噏

外界炮轟新一份施政報告背逆民意，市民強烈要求復建居屋，但政府就硬推先租後買嘅「置安心」計劃；叫政府扶貧，增加經常性開支，政府則揼大孖沙心口，整個一次性嘅「關愛基金」出嚟，仲要搞幾年行政工作先做得到，根本遠水救唔到近火，基層市民梗係㷫到爆啦！

三十六頁文件報舊料

煲呔曾做完幾場大騷，班問責局長今日開始輪流去立法會相關事務委員會解畫，而半數嘅政策局已經提交相關文件畀立法會，大部分都係十頁紙度，少則三至七頁，但排隊排到下禮拜五去解畫嘅環境局局長邱騰華，提交嗰份文件足足有三十六頁紙，仲好似施政報告咁分節分段。

有好多大計咩？若果咁諗就全部錯晒，三十六頁紙全部都係舊料，話會繼續做廢物源頭分類，又話鼓勵市民用節能照明，又話會逐步取代鎢絲燈膽。但係早前好似當年「八萬五」咁話唔講就冇咗嘅慳電膽現金券，同埋呢幾日全城熱爆嘅擴堆填區廢令，就好似推咗落堆填區咁隻字不提，只係重申堆填區就嚟爆滿，會發展先進科技嘅焚化管理設施，同埋就兩個選址進行緊研究。

最搞笑嘅係，當中都有提及郊野公園，話要進一步做好郊野公園附近嘅土地規管，以免郊野公園受到破壞。政府話要擴建將軍澳堆填區，就要攞郊野公園五公頃土地，咁唔係破壞郊野公園咩？文件呢段，邱騰華簡直自摑嘴巴。咁你話嘞，成份文件都係廢噏兼吹水，嘥晒啲紙，邱騰華個局主推環保，原來最唔環保嘅係佢。

三失局長頭耷耷離場

老實講，前晚立法會高票通過廢除擴建將軍澳堆填區嘅法令，各黨派議員喺辯論過程中鬧爆邱騰華之外，仲炮轟佢係「三失局長」，喺事件中失職、失誤、失敗，要求佢同副局長潘潔一齊問責下台，鬧到佢頭耷耷咁離開議事廳。再加上邱騰華上場後力推多個環保重點項目都衰晒，若果係咁唔掂嘅話，不如將佢都推入堆填區罷啦！