Sun世代：教書夢碎反成契機

黃冰芬的爸爸是小學教師，她由細至大，都一直以為自己畢業後，會以教師為職業，大學也選讀語文學系，早已為教書鋪好後路。不過，世事難料：「畢業之後，由於出生率下降，好多學校都縮班，要成功搵到教席並唔容易。」Iris其後投身地區工作，也是因着當初參與「青年關注社」，認識不少地區人士，打通人脈，才有這個機緣。

未定性唔敢教書

「未畢業之前，我已經做緊一份兼職，幫沙田區一名區議員做嘢；之後佢話有區議員助理空缺，問我有冇興趣，引起我嘅好奇心，就諗住畀兩年時間自己，睇吓做成點。」從事地區工作，可以接觸不同層面人物，「好多工作好有挑戰性」，正適合Iris的性格。雖然她工作出色，開始嶄露頭角，不過，她仍未決定下一步方向：「我依家仲未定性，仲係嘗試階段，未敢諗下一步點走，只希望做好手頭上嘅工作。」

至於日後會否春風化雨，投身教育界？ Iris自認人生閱歷尚淺，暫時不會考慮：「除咗傳授知識，我覺得培養學生嘅個人品德、同佢哋分享人生經驗都好重要，我依家太後生，仲未定性，教書唔係咁合適。」