政情：霍公子建制派飯局拉票
政情：霍公子建制派飯局拉票
立法會建制派尋日開飯局，記者尋晚七點去中華總商會飯堂湊熱鬧，各黨都有代表出席，但竟然見到位稀客，佢就係文化、體育及出版界代表霍震霆嘞。
飯局共有二十六位建制派議員捧場，席間大家交流對施政報告嘅意見，又敲定立法會各委員會正、副主席協商名單。不過，呢啲都係例行公事，反而喺最後一個「議程」，輪到霍公子起身發言為香港申亞拉票，最令大家精神一振。
有建制派議員話，印象中從未見過身兼港協暨奧委會會長嘅霍公子出席飯局，佢發表飯局「講話」更加千載難逢。霍公子一起身就開宗明義，希望大家支持申亞，點名叫建仔同富貴黨唔好咁早企硬反對。霍公子豁出去，在座議員亦不顧「議事規則」，一齊起哄，七嘴八舌，有議員叫出嚟，指霍公子冇為拉票做足政治聯繫工作：「識你咁耐，淨係請我睇過兩場波！」睇嚟霍公子拉票仍需努力。