政情：搞搞政：林健鋒急護航 發叔甩身封嘴

行政會議成員劉皇發係經濟動力嘅核心成員，但自捲入漏報買樓利益風波後，一直鮮有公開露面。立法會尋日正式復會聽新一份施政報告，發叔終於現身，會後亦有出席經濟動力嘅記者會，當然成為議事廳內外嘅焦點。

林健鋒、梁君彥、梁劉柔芬同發叔一齊開記招，4L整整齊齊亮相，攞住本施政報告影大合照。不過，發叔之後再冇發言，全程封口，由其他3L點評施政報告。

發叔旗下嘅宏景投資持有嘅四幅農地，部分地段租畀他人後被改建成為野戰場，瀕臨被「釘契」危機。記者喺經濟動力嘅記招上趁機想向發叔問個明白，但遭反應奇快嘅林健鋒攔截，叫記者問番施政報告嘅內容。發叔有林健鋒幫手解圍，直到記招結束，都可以冇出過一粒聲。

尋日幫發叔解圍嘅仲有煲呔曾，佢喺施政報告記者會上，被指喺漏報風波中「攬」發叔，煲呔曾一邊回應話唔明個「攬」字係乜嘢意思，一邊又「攬」發叔一次，強調相信發叔旗下公司嘅物業買賣已喺田土廳有登記，所以發叔先至冇向行會申報啫！