政情：黃婉曼拍片助特首辦推銷
政情：黃婉曼拍片助特首辦推銷
繼報天氣、講世界盃、街頭派三文魚後，「天氣女神」Icy黃婉曼最近殺入政府嘅facebook喉舌「上亞厘畢道」，尋日下晝先後發現幾條Icy宣傳施政報告嘅短片，仲係用佢最耍家嘅報道天氣方式，去介紹施政報告內容，對住香港地圖指手畫腳。
Icy一開場就話：「今日係黃婉曼同你哋一齊睇吓施政報告！」然後帶大家巡遊各區，先後介紹天水圍（就業及培訓中心）、荃灣（仁濟醫院重建）、青衣、沙田、大埔（置安心資助房屋計劃）同旺角、中環、銅鑼灣（低排放試點）。佢又帶大家捐入地下，介紹港鐵轉車站將提供還書箱服務；跟住又跳出香港，介紹內地養老嘅長者嘅福利配套。
據聞特首辦一個禮拜前搵Icy幫手拍短片，然後安排尋日施政報告發表時出外取景拍攝，全程由特首辦特別助理Ronald陳岳鵬陪伴左右。
黃婉曼再變身「天氣女神」，免費幫政府推銷施政報告。