政情：施政報告催眠勁過睡魔

政府不嬲都係頭痛醫頭、腳痛醫腳，尋日發表嘅新一份施政報告都唔例外，宣讀時間拖長到兩粒鐘，好似催眠咁，搞到議事廳內好多行政會議成員、司局級官員同議員都悶到瞌眼瞓，要用盡各種方法對抗睡魔急Call。

煲呔曾首部分講房屋計劃，大家仲頂得順，但讀到中至尾部分，睡魔開始急Call。好似坐喺公眾席上嘅行會成員「金刀梁」梁智鴻，不斷「釣魚」瞌眼瞓，釣完又醒；查史美倫就經常玩手機，由開場玩到完場。不過最奇怪係中大前校長劉遵義，佢經常點頭畀反應，唔通佢畀咗好多意見？

副局長同政治助理方面，運輸及房屋局副局長邱誠武為免瞌眼瞓，經常抬高頭令自己精神啲，而商務及經濟發展局副局長蘇錦樑就頻頻用iPad睇文件，最精神嘅相信係民政事務局副局長許曉暉。有人發現，財經事務及庫務局政助「坡妺」伍潔鏇着裙露出長腿，但坐唔定，不時更換坐姿，幾近失守走光。

班高官一樣眼瞓到暈，財爺鬍鬚曾、保安局局長李少光同議員黃定光經常閉目養神，而梁君彥又係玩iPad。唔想瞓着出醜又可以點呢？好似環境局局長邱騰華同多位議員就選擇中途離開議事廳鬆吓。