政情：議員各出奇謀鬥出位

立法會尋日復會，煲呔曾發表施政報告，大部分出席嘅泛民同個別建制派議員，枱上都擺放咗各式各樣嘅示威道具，包括爭取全民退休保障聯席派發嘅「2036退休危機時鐘」，以及富貴黨主席劉健儀派發嘅反對擴建堆填區貼紙同單張等。

職工盟李卓人、街工梁耀忠同社福界張國柱，就放多咗幾個貼上「72」數字嘅氣球，爭取立法規定每周工作最多七十二小時。工聯會四子最多花樣，帶咗一個象徵取消生果金離港限制嘅生果籃、一個象徵跨區交通津貼擴至全港嘅塑膠水樽（交津），同埋一塊爭取長者醫療券加碼到一千蚊嘅紙牌。

社民連三子喺正式開會前，放咗三塊大型示威牌喺枱面，分別寫住「反政商勾結」、「反地產霸權」同「反跨代貧窮」，搞到坐喺隔籬嘅白鴿黨副主席劉慧卿好唔高興，投訴阻住佢視線。

正式開會時，立會主席要求大家站立靜候煲呔曾進場，但已在場嘅黃毓民同「長毛」梁國雄就堅拒起身，遲到嘅「大舊」陳偉業更加高舉內地被囚異見人士劉曉波嘅畫像同一支香檳，威脅要即場開香檳慶祝劉曉波獲頒諾貝爾和平獎。主席先後講咗最少五次「請議員站立」，三人都當佢冇到。其中長毛就以迅雷不及掩耳嘅速度掟咗個「退休危機時鐘」去煲呔曾席前，再自行快閃離開，等主席冇機會宣布佢違反議事規則趕佢走，又做到向煲呔曾「送鐘（終）」嘅效果。班議員愈玩愈多花臣，睇嚟議事廳想靜都幾難。