政情：設動物公園白鴿邀功

新一份施政報告洋洋幾萬字，但冇乜新意，簡直係悶死人，但報告破天荒觸及動物權益，仲建議設立動物公園，呢啲細微嘢觸動唔少議員嘅神經。

政府難幫黃志光補飛

白鴿黨尋日喺記者會上搶住邀功，黨主席「鐵頭仁」何俊仁話佢哋早前見煲呔曾時，首次建議佢將動物權益納入政策，估唔到政府肯接納佢哋嘅意見。黨友張文光更直言，對呢個關於動物權益嘅政策好有「好感」，冇諗過政府咁快做嘢，仲笑言如果政府對取消區會委任制都咁易話為就發達喎。

白鴿黨真係叻唔切，當正呢項建議係佢哋嘅政績咁，順便寸埋政府喺政制發展做得慢，查實佢哋咁諗實在太天真同太傻喇，事關政府今次咁罕有地高度重視動物權益，只係幫自己友補飛，白鴿黨抓爛塊面出嚟邀功真係瘀爆。

據了解，政府今次之所以有咁嘅安排，完全係為自己拆政治炸彈。猶記得喺暑假期間，漁農自然護理署人員被揭喺天水圍捕捉流浪狗時涉嫌虐狗，署長黃志光更發表冷血言論，話捉狗就好似捉賊咁，冇理由捕捉期間整傷佢就要將佢放生，事件惹起社會公憤，逾千名愛狗市民更應網上號召，兩度上街遊行，抗議當局冷血。聽講，政府有感呢件事係一個相當具殺傷力嘅政治炸彈，所以先安排喺施政報告度高調安撫民心，順便幫署長黃志光補飛，並唔係因為被白鴿黨所打動。

之不過，施政報告嗰幾項建議同愛護動物團體及人士提出嘅要求相距甚遠，佢哋已出嚟鬧政府，咪話幫黃志光補飛，政府可能仲被抓多幾下添！

克勤仔年初已提質詢

講到動物權益，其實白鴿黨並唔係先驅者，建仔嘅議員陳克勤早喺年初已喺立會提出書面質詢，要求民政事務局曾德成盡快設立動物公園。克勤仔尋日聽到白鴿黨搶住領功，似乎唔多高興，仲直言白鴿黨區議員潘志文早前爆出要求愛貓組織迫遷嘅醜聞，一眾愛護動物人士其實都唔會想見到該黨依家喺度抽水喎！