政情：梁寶珠踏台板演功架
政情：梁寶珠踏台板演功架
保良局副主席Jacqueline梁寶珠同「影迷公主」陳寶珠有個相似嘅名，無獨有偶，Jacqueline都鍾情舞台，十年前由初哥學起，走圓枱拉筋壓腿，苦練一字馬。上禮拜一，佢喺沙田大會堂踏台板，啲戲迷仲追住佢大叫「寶珠姐」。
Jacqueline係成功製衣商人，唱大戲係業餘興趣，但為咗一連三日嘅演出，佢籌備咗足足一年。佢細個時鍾意跟婆婆入戲棚睇大戲，但只係坐喺台下做戲迷，直至十年前遇到啟蒙老師廖森，愈唱愈有癮。佢話學粵劇最大得着係大膽咗，唔再怕怕醜醜，跟隨大老倌林錦棠登台，亦未嘗蝦碌。
梁寶珠（右）飾演男版祝英台，扮相俊朗，連囡囡林玉茵都忍唔住讚媽咪好靚仔！