政情：陳振彬開壇CY搶風頭

為加強同年輕人嘅溝通，青年事務委員會主席Bunny陳振彬尋日搞咗個「80後」論壇，請嚟多位「80後」青年交流。

在場唔少「80後」嘉賓都唔多認同Bunny嘅觀點，更有人質疑佢掌舵下嘅青委會成員可以拍得住安老事務委員會成員嘅年齡，又批評近年新開嘅青年廣場租金極貴，青年人根本負擔唔嚟。

面對咁多投訴，Bunny笑言青委會成員同安老委員會成員嘅年齡仲差一截，至少後生過婦女事務委員會嘅成員喎；又話青年廣場內嘅寫字樓好多都由年輕人租用。

行政會議召集人CY梁振英都有到場，佢唔單止坐足全場，完場後仲捉實班「80後」雞啄唔斷，主人家走咗佢都唔願走，搶晒風頭。