政情：搞搞政：王桂壎愈忙愈肥唔敢選立會

二○一二年立法會新增十個議席，唔少人都準備爭入熱廚房，但有個人例外。邊個？咪就係香港律師會會長王桂壎囉！王桂壎前排先連任會長，而且參加嘅社會事務愈嚟愈多，前排仲幫埋廠商會手，落區幫街坊做法律諮詢，大有積極備戰之勢，點解忽然話唔選？

以前做過政府律師同前行政立法兩局議員辦事處法律顧問嘅王桂壎直言，對議員寶座興趣唔大，仲話雖然享受立法過程嘅工作，但喺兩局時已經睇夠、做夠，加上自己唔太戀棧權力，所以有時間都希望做多啲實事，直接幫到市民就最高興。佢仲自爆唔選立法會之餘，可能亦唔會再增加公職事務。

原來王桂壎慣咗一多嘢做、壓力一大，就會忍唔住口係咁食嘢，所以兼顧律師樓同各項公務，已經令佢發福唔少，佢笑言再做「兼職」，會擔心自己體重超標喎！

唔通佢唔想選立法會，都係同自己嘅身形有關，怕變咗大肥佬？聞言佢就笑笑口唔出聲嘞！其實入熱廚房焗四年桑拿，分分鐘減到肥仲通埋血氣，王桂壎可以再諗諗喎！