政情：邱騰華勢阻建制派飯局

政府一早預告咗，今日喺立法會發表嘅施政報告會比以前長，分分鐘講足兩粒鐘，換言之，立法會最快下晝一點先可以辯論擴大將軍澳堆填區嘅廢法議案同進行表決。

雖然立法會主席為咗慳時間，已經決定將廢法同政府嘅延遲擴大堆填區議案一併辯論，但每個議員仍然有十五分鐘發言時間。有好多議員都話，今次政府嘅法律意見簡直係踩到立法會上心口，絕對唔可以就此罷休，肯定會用盡十五分鐘鬧盡環境局局長邱騰華，等佢明白自己有幾不知所謂。

立法會秘書處初步估計，今日嘅立法會大會好可能要講到八點先完，但咁啱建制派議員約咗喺七點有飯局，咁即係話邱騰華阻住佢哋開飯，莫非要焗住改期？個別建制派議員就話唔得，因為時間太趕，大家又忙，一改又唔知幾時先約得齊人，惟有大家齊齊捱肚餓，等每個議員鬧夠邱騰華、投埋票先去食飯。好彩仲有議員識得自得其樂，話如果早散會可以食晚飯，遲咗大家就一齊食消夜，都係新嘗試喎。

議員要捱肚餓之外，有壓力團體更揚言，為睇實班功能界別議員投票，決定派人守住立法會各個門口，唔畀佢哋喺投票前走，不過相信到時立法會保安同警察都會保護佢哋嘅。