政情：李剛邀徐文國開書畫展
政情：李剛邀徐文國開書畫展
內地書畫家徐文國嘅作品由尋日開始，一連三日喺上環文娛中心展出，而中聯辦副主任李剛尋日喺揭幕禮上自爆同徐文國嘅一段淵源。
李剛話識咗徐文國差唔多三年，記得初次睇到對方作品時感到好震撼，事關今年只係五十歲嘅徐文國年紀唔大，但佢所畫嘅山水畫氣勢磅礡，人像畫又夠細緻。跟住李剛又謙稱自己「不會畫、不會寫，看的比較多」，但就好有興趣幫徐文國喺香港搞展覽，只係對方以作品唔多為由而一直未成事。今次終成功開到書畫展，李剛笑笑口話唔係花咗好多時間游說，一邀請徐文國就掂。
李剛喺九三至九四年擔任文化部對外文化聯絡局副局長，九八至○一年更升任局長，對文化藝術嘅認識一定有番咁上下，分分鐘認識深過班特區官員。
李剛稱自己「不會畫、不會寫，看的比較多」。