政情：We Wet 強隨時裸退

身兼新界鄉議局副主席同坪洲鄉事委員會主席嘅「We Wet強」林偉強今年是非不絕，一度捲入涉嫌騙取區議會辦事處租金津貼風波，事件或會影響下年鄉委會換屆選情。不過，唔使等到下年，今個月二十四號已係個關鍵時刻，事關坪洲嗰日會選出十七個街坊代表，We Wet強有幾多支持者撐佢，就可以預視到後果會係點嘞。

據聞，坪洲鄉委會有兩股勢力正喺度角力，包括挺強派（黑衫）同倒強派（黃衫），雙方為爭奪街坊代表席位各派出十七人參選，即係兩邊都晒行馬，再加上兩邊形勢更係各佔一半，選情可謂五五波，所以「黑衫軍」同「黃衫軍」最近均密密展開拉票活動，希望扯多啲街坊支持自己嘅陣營。據知情人士透露，如果We Wet強嘅支持者喺選舉中失勢，明年就難以連任鄉委會主席，自然唔能夠以當然議員身份進身離島區議會，當然區議會主席都要換人啦！

荃灣鄉委會鍾偉平成勁敵

如果We Wet強做唔到坪洲鄉委會主席，仍然能夠以太平紳士身份進身鄉議局，到時冇咗鄉委會，又唔係村代表，有冇人支持佢再做鄉議局副主席都成問題。最近喺啲鄉紳圈子中有流傳，話荃灣鄉事委員會主席鍾偉平係副主席熱門人選之一，咁即係有疑似勁敵出現咗嘞。

喺咁嚴峻嘅形勢底下，We Wet強喺呢次街坊代表選舉可謂係背水一戰，倘若佢失勢，相信難以連任鄉委會主席、離島區議會主席同鄉議局副主席，屆時真係一鋪清袋。

缺席新大樓上樑激嬲發叔

老實講，鄉議局內部都有唔少鄉紳對We Wet強嘅表現有微言，早前鄉議局沙田石門新大樓上樑儀式咁大件事，We Wet強都缺席，反而走去服侍班離島區議員遊上海世博，激到主席劉皇發紮紮跳，發叔到時係咪撐佢做副主席就好難講囉！