政情：專業會議齊心撐廢法

為阻截政府擴建將軍澳堆填區，立法會內六黨罕有企喺同一陣線支持「廢法」議案，喺呢種大環境，過往有時出現口徑不協調情況嘅專業會議，今次亦同仇敵愾，槍口一致對外。專業會議四名成員中，地產及建造界議員「大舊石」石禮謙同嚟自九龍西地區直選嘅梁美芬，以前耐不耐會出現口徑不協調情況，好似今年四月激辯預算案嘅刪除一億五千萬元立法會補選經費，二人就一度打對台，大舊石由於不滿議員重複論調，三次企起身指議員離題，就算同屬「黨友」嘅梁美芬講到台灣政治，佢都冇面畀，要求主席裁決，唔好畀議題借題發揮。

不過，最近立法會同政府呢場擴建堆填區大戰，就令專業會議團結起嚟。據聞，四人已有默契，決定不論最後支持「廢法」議案與否，佢哋都一致投票，共同進退，依家等緊政府嘅詳細法律理據文件，同埋今日了解埋立法會方面嘅資深大律師戴啟思嘅意見後，聽日中午就會做最後決定。不過，睇目前形勢，佢哋四人支持「廢法」嘅機會仍然較大。