政情：肥平幫手復修大澳棚屋
政情：肥平幫手復修大澳棚屋
早前有個名為「仁人家園」嘅國際非牟利組織發起大澳棚屋復修計劃，協助當地三百幾間水上人家復修保育，以保留呢個已有二百幾年歷史嘅水鄉。佢哋尋日喺九龍灣舉行籌款活動，席間仲見到民政事務局前局長「肥平」何志平，原來佢係仁人家園災後重建榮譽顧問。
自稱退休後遊戲人間嘅肥平話當地棚屋嘅業權好複雜，因為啲屋仔起喺水上而唔係地上，多數冇業權，有啲係舊時啲人霸咗間屋嚟住，政府好難插手做嘢。所以當時政府決定唔插手，認為由民間力量去進行保育最好。
大澳有四百幾間棚屋，仁人家園揀選約三百間符合資格嘅進行復修，依家已修畢二十幾間，俊和主席彭一庭話希望年底可以抽到身去幫公公婆婆復修棚屋喎！
何志平（右）同彭一庭齊撐大澳復修計劃，保留香港呢個已有二百幾年歷史嘅水鄉。