政情：零食天王發達靠三寶
政情：零食天王發達靠三寶
人稱「零食天王」嘅四洲集團主席戴德豐，仲有個外號叫「卡樂B之父」，原來佢第一桶金唔係靠賣卡樂B發達，而係百力滋、太空糖同三粒糖至真。
早前喺十．一酒會見到身兼全國政協委員嘅零食天王，佢笑言家族生意已交晒畀太太胡美蓉同仔女打理，自己專注做公職。佢讚囡囡戴凱欣有諗頭，揸Fit做市場推廣，將零食王國搞得有聲有色，令佢好放心。至於咁幫得手嘅戴太早前同我哋講，佢只揀健康嘅零食，最鍾意紫菜同梳打餅。
佢嘅零食生意做得咁成功，全靠當年夠眼光，諗番起嚟，佢自爆第一桶金係靠零食三寶，即係百力滋、太空糖同三粒糖，之後至愈賣愈多種類，終於搞咗個零食王國。時下細蚊仔可能對太空糖同三粒糖有啲陌生，但對於中年人嚟講，就係陪伴成長嘅童年回憶，依家已經成為香港嘅懷舊文物嘞！
戴德豐嘅零食生意做得咁成功，全靠當年夠眼光。