政情：搞搞政：擺網球上枱？曾德成撩交嗌

喺立法會建制派同泛民主派反對申辦二三年亞運會，質疑政府搞大白象工程後，外界亦翻舊帳，炮轟政府當年申辦○六年亞運時，承諾若申辦失敗，建議興建嘅體育設施都會照起，點知十年都冇兌現。

被嘲為「惡推銷員」嘅民政事務局局長曾德成尋日喺局長隨筆中就以馬鞍山運動場為例，若申亞成功就會加建座位，後來申辦失敗就唔加建，以免造成浪費，指有傳媒指政府冇兌現承諾，叫公眾評下理。

呢個只係單一例子，若果佢唔健忘嘅話，咁仲有屯門起一個極限運動中心同埋白石角興建國際小型賽事場等等呢？

跟住又話有網球界嘅朋友同佢講，香港獨欠符合盛事標準嘅網球場，所以一直辦唔到世界級賽事，佢引述嗰位朋友好唔客氣咁同佢講，亞洲甚至內地多個城市嘅網球場都遠比香港好，香港嘅網球場設施肯定唔係世界級，唔係地區級，甚至唔係省市級。佢打蛇隨棍上，話世界級盛事標準嘅網球場有好多配套設施，而呢啲設施一年用唔上幾次，仲反問呢啲城市係咪都養咗大白象呢？

嘩！咁都得？佢擺明喺度撩交嗌啫！睇怕香港有條件搞世界級網球盛事嘅意見唔係突然爆出嚟啩，咁點解佢早唔講遲唔講，拖到依家申辦亞運先嚟講吖？佢係咪撐到亂晒龍，塞番自己把口呀？