政情：蘇永強晒自家品牌靚錶

日前喺鐘錶展見到香港錶廠商會會長阿Paul蘇永強，佢本身做錶廠做咗三十幾年，咁佢心目中最靚嗰隻係乜嘢錶？咪就係佢一手湊大嘅自家品牌odm囉！佢好自豪咁展示腕上嘅odm「3 touch」系列時款模擬電子腕錶，隻錶最特別之處係錶圈外圍嘅四粒按掣消失咗，改為觸控式，設計更簡潔時尚。

阿Paul話初初專幫人做代理，十年前有感於香港同內地消費市場龐大，於是自創品牌打天下。依家odm喺本港有四間專門店同埋八十個零售點，內地就有一百五十間銷售據點。為咗避開同貴價錶正面競爭，所以佢專攻年輕人市場，錶價由六百元起，貴極都只係三千元。品牌以設計時尚、功能創新為賣點，加上色彩繽紛，甚受追求潮流嘅年輕人追捧。

佢係成熟穩陣派，所以當日佢揀咗隻售價約二千元黑色膠錶戴。佢話隻錶可以調校時針或跳字，又有國際時間，啱晒經常出埠嘅香港人喇！