本文重點
慳水、慳電、慳紙係環保新人類嘅最低要求，不過，立法會議員中就有好多負面典範，事關秘書處尋日發出通告，叫班議員重新檢視對立法會文件複印本嘅需求，一問至知，原來六十位議員中，有成十幾人要求全部文件嘅複印本，好多人仲係中英文各一份，三大黨主席即建仔嘅譚耀宗、白鴿黨嘅鐵頭仁同富貴黨嘅劉健儀（Miriam），更九成文件要複印本，真係唔多環保噃。
環保委員會唔環保
不過，佢哋都未算最勁，因為成日畀外界評為「懶蛇」嘅幾位立法會議員，包括金融界李國寶、演藝、體育、文化及出版界霍震霆同金融服務界詹培忠，都要晒所有文件嘅複印本，齊齊榮登「嘥紙王」寶座。以前仲未電子化時，每日送去議員辦事處嘅文件分分鐘有幾吋厚，估唔到家吓完全電子化，議會都係唔可以用少啲紙。
離譜嘅仲有，專責環保事宜嘅環境事務委員會成員理應有多啲環保意識，但事實卻令人大失所望，過半委員都拎超過七成嘅複印文件，議員真係要諗吓點樣先可以用少啲紙喇！