呻十年前被迫推銷

民主阿婆尋日出席一間傢俬舖嘅開張儀式，記者問佢點睇政府申亞，佢劈頭第一句就話十年前政府申亞，佢都有保留，但作為政務司司長，當行會拍咗板，就有責任盡力推銷。劃清界線之後，佢再踩多兩腳，話質疑政府依家用咁多錢申亞物非所值。

翻查剪報，二○○○年三月政府申亞委員會開首次會議，當年民主阿婆大聲疾呼，指香港擁有人才同高國際知名度等多項申亞優勢，表示極希望立法會支持撥款。都唔知民主阿婆到底幾時講真幾時講假。

民主阿婆之後又批評「新界王」劉皇發漏報買樓利益，會削弱行政會議整體嘅誠信，暗示叫發叔辭任行會成員咁話。不過，佢好似博大家唔記得，當年佢都曾經爆出過以十成按揭買樓嘅醜聞啦！